Лӧддза-номъя тӧлысь 23 лунӧ чукӧртчывліс «Коми войтыр» ӧтмунӧмлӧн Исполком, кӧні видлалісны видз-му овмӧсъяслы отсӧг сетӧм да республикаын спорт сӧвмӧдӧм. Заседаниеын участвуйтісны Коми Республикаса Юралысьлысь могъяс недыр кадколастӧ збыльмӧдысь Владимир Уйба, дінмуса видз-му овмӧс да потребительскӧй рынок министрлысь удж вӧчысь Денис Паспеков, Коми Республикаса спорт да мортӧс ёнмӧдан министр Николай Бережной, а сідзжӧ уджӧ пырӧдчисны кар-районъясын администрацияясӧн веськӧдлысьяс да ӧтмунӧмлӧн юкӧнъясӧн юрнуӧдысьяс.
«Коми войтырса» водзмӧстчысьясӧс майшӧдлӧны мытшӧдъяс, кутшӧмъяс йитчӧмаӧсь сиктъясын олӧм бурмӧдӧмкӧд, видз-му овмӧслы отсалӧмкӧд да сиктса районъясын спорт сӧвмӧдӧмкӧд. Юалӧмъясыс инмӧны сиктын быд олысьлы, торйӧн нин налы, кодъяс вылын кутчысьӧ сиктса районъясын олӧмыс – видз-му вӧдитысьяслы, скӧт да лэбач видзысьяслы, асшӧр овмӧс нуӧдысьяслы, фермеръяслы. Зэв тӧдчана, мый унджык юалӧм вылас вӧлі сетӧма подула вочакыв да эска, мый тайӧ паныдасьлӧмыс бур вылӧ лоас сиктсаяслы. Торйӧн кӧсъя пасйыны, мый заседание вылын вӧзйисны нуӧдны Коми Республикаын Сиктлы сиӧм во. Коми Республикаса Юралысьлысь могъяс недыр кадколастӧ збыльмӧдысь Владимир Уйба шуис, мый тайӧ зэв тӧдчанатор да сёрнисӧ колӧ кыпӧдны федеральнӧй тшупӧдын», – висьталіс Коми Республикаса национальнӧй политика министр Галина Габушева.