Коми гижысьяслӧн котыр нуӧдӧ публичнӧй лекцияяс. Таво найӧс сиисны Геннадий Юшковлы да Владимир Тиминлы.
Медводдза лекциялӧн темаыс вӧлі «Коми литературалӧн классик Г.Юшковлӧн тӧдчанлун да талунъя видзодлас», нуӧдіс гижысьлӧн нылыс Марина Плеханова, филология наукаса кандидат, Россияса гижысьяслӧн котырӧ пырысь. Во помӧдз Сыктывкарын мунас Г.Юшковлӧн творчестволы сиӧм нӧшта куим лекция. Матыссаыс мунас ӧшым тӧлысь 15 лунӧ 13:00 часын Коми Республикаса национальнӧй библиотекаын.
В. Тиминлӧн творчество кузя публичнӧй лекцияяс мунасны коми гижысьлӧн чужанінас - Сыктывдін районын. Вӧльгым тӧлысь Зеленечса шӧр школаын Олег Уляшев, Россияса гижысьяслӧн котырӧ пырысь, Коми наукаса шӧринлӧн Кыв, литература да история институтын уджалысь, филология наукаса кандидат нуӧдас кык лекция. Вӧльгым тӧлысь 30 лунӧ Олег Иванович паныдасьлас Паджга сиктса олысьяс водзын.
Проектсӧ отсалӧ вӧчны Коми Республикаса национальнӧй политика министерство. 2016 воын министерстволӧн водзмӧстчӧмӧн нуӧдісны Каллистрат Жаковлӧн творчестволы сиӧм восьса лекцияяс. Лекторнас вӧлі Павел Лимеров, Коми наукаса шӧринлӧн Кыв, литература да история институтын наукаса сотрудник, филология наукаса кандидат, «Арт» журналлӧн юралысь редактор.
2018 воын публичнӧй лекцияяс сиасны Виктор Савинлы да Альберт Ванеевлы, кодъяслӧн лоасны тшупӧда пасъяс.