Конференцияын участвуйтісны сиктса овмӧдчӧминъяслӧн юралысьяс, районса сӧветлӧн депутатъяс, администрацияын уджалысьяс, предприятиеясӧн да организацияясӧн веськӧдлысьяс. Конференцияын участвуйтіс Коми Республикаса национальнӧй политикаса министр Галина Габушева.
Конференция вылын тыръюӧръяс лыддисны «Коми войтыр» МОД-лӧн Луздорса петкӧдланінлӧн исполкомӧн веськӧдлысь Галина Попова да «Луздор» муниципальнӧй районса администрацияӧн юрнуӧдысьӧс медводдза вежысь Наталия Жук.
Кыдзи юӧртіс муниципалитетлӧн администрацияса пресс-служба, делегатъяс да корӧмаяс кыпӧдісны «Коми кыв кыдзи канму кыв» велӧдан предмет кольӧм йылысь, Вӧрса сӧветлӧн удж йылысь, вот урчитӧм йылысь, социальнӧй юкӧнса объектъяс стрӧитӧм йылысь юалӧмъяс. Та кындзи сёрнитісны сиктса овмӧдчӧминъяслы видз-му овмӧсса техника сетӧм йылысь, посъяс да туйяс дзоньталӧм йылысь, районын «Россельхозбанклысь» содтӧд офис восьтӧм йылысь да мукӧдтор йылысь.
Тӧлысь помӧдз «Коми войтырлӧн» меставывса исполком районса администрациякӧд ӧтув видлаласны делегатъяслысь став вӧзйӧмсӧ, пыртасны найӧс резолюцияӧ да дасьтасны 2018 во кежлӧ ӧтувъя уджлысь план. Тайӧ плансӧ ыстасны Коми Республикаса национальнӧй политика министерстволы да олӧмӧ пӧртысь власьт органъяслы, кодъяслӧн уджмогъясӧ пырӧ урчитӧм мытшӧдъяссӧ разьӧмыс.
Резолюциянас тӧдмӧдасны йӧзӧс.
«Луздор» муниципальнӧй районса администрациялӧн пресс-служба