Республикаса национальнöй библиотека май дас витöд лунö лыддьысьысьяслы вöзйö öттшöтш пасйыны коми письменность лун да коми литература подув пуктысь Иван Куратовлысь 175 (се сизимдас вит) вося юбилей.
Тайö лунö кывкöрталасны да нимöдасны «Я знаю о Куратове» литература серти республикаса викторинаын вермысьясöс. Викторинаö республикаса кар — районъясысь пырöдчылiс ставнас 165 морт. Тайö и велöдчысьяс, и студентъяс, и олöма йöз. Материалъяс мöдöдлiс и Марий Элын олысь. Рыт вылö воысьясöс гажöдасны Наталья Канова да «Коми сьылан» йöзкостса котыр. Уджтас кежлö дасьтасны куим выставка: «Коми кывлöн вын да мич», «Кывбуръясас радейтöмöн пуктiс ассьыс ловсö», «Республика Коми - юбилею Куратова», петкöдласны и викторинаын водзмöстчысьяслысь уджъяс. Выставка вылысь позяс аддзывны поэтлысь сюрс öкмыссё комын кыкöд воын петöм медводдза «Гижöд чукöр».