Галина Габушева чолӧмалiс 60 арöс тырӧмöн Е. А. Цыпановӧс
«Пыдди пуктана Евгений Александрович!
Кыпыд ловруӧн да пӧсь кывъясӧн чолӧмала Тіянӧс Коми Республикаса национальной политика министерство нимсянь да ассянь гӧгрӧс пасӧн – 60 арöс тырӧмöн!
Коми муным озыр аслас ныв-пиянӧн, кодъяс тӧждысьӧны да зільӧны видзны коми войтырлысь оласногсӧ, вӧр-васӧ, нэмъясӧн тэчсьӧм традицияяссӧ, сӧвмӧдӧны чужан кывнымӧс да литература, культура да наука. На пиын, медводдзаяс лыдын Ті – нималана лингвист, радейтана велӧдысь, пыдди пуктана веськӧдлысь, енбиа вуджӧдчысь да гижысь.
Мир пасьтала Ті нималанныд финн-угор кывъяс туялысьöн. Тіян уджъясныд юргисны уна сикас да вылыс тшупӧда форумъяс дырйи, тшӧтш и Финн-угор туялысьяслӧн ставмирса конгрессъяс вылын.
Ті пуктінныд тӧдчӧмӧн ыджыд пай коми филологияӧ, Коми наука шöринлӧн Кыв, литература да история институтын уджалігӧн топыд йитöдъяс кутанныд Сыктывкарса канму университеткӧд, финн-угор дінмуясын велӧдчанінъяскӧд да наука учреждениеяскӧд, газет-журнал редакцияяскӧд, ӧтйӧза котыръяскӧд.
Коми Республикаса национальнӧй политика министерстволы тшӧтш уси шуд Тіянкӧд ӧтув уджавны да пӧртны олӧмӧ уна сикас проект, кодъяс йитчӧмны коми кыв видзӧмкӧд да инмӧны верстьӧлы, томуловлы да челядьлы. Кызь вит во Ті зілянныд Коми Республикаса Юралысь бердын уджалысь кыв комиссияын да уна вын сетанныд выль кывъяс артмӧдӧмлы да найӧс паськӧдӧмлы. «Коми кыв: самоучитель коми языка», «Рöмпöштан», «Видза олан!» велӧдчан небӧгъяснад рочьяс да мукӧд кывъя войтыр велӧдӧны коми кыв да тӧдмасьӧны Коми Республикаын олысьяскӧд, сылӧн историяӧн да культураӧн.
Коми войтырлы мойвиис сыын, мый эм наукаын туялысь, коді сьӧлӧмнас висьӧ чужан кыв вӧсна да ачыс зільӧ коми кывъя литератураын да журналистикаын. Ми окотапырысь лыддям Тіянӧн гижӧм висьтъяс, сатираа серпасторъяс, комиӧдӧм гижӧдъяс, мойдъяс да тешкывъяс.
Евгений Александрович, миян бур ёртным, ыджыд аттьӧ Тіянлы ставсьыс, тшӧтш и эксперт туйын уджалӧмысь да коми войтырлӧн ӧтйӧза ӧтмунӧмын зільӧмысь. Кутам лача, мый водзӧ на кутам ӧтув пӧртны олӧмӧ национальнӧй политикалысь шӧр нырвизьяссӧ.
Сиам быд бурсö: зумыд дзоньвидзалун, помтӧм-дортӧм шуд, тыр-бур олӧм, кыпыд ловру, наукаын да творчествоын гырысь шедӧдӧмъяс!
Ен да бур йӧз!
Вежавидзӧмӧн,
Коми Республикалöн национальнöй
политика министр
Г.И. Габушева».
Фотографияяс
 |
