Вячеслав Гайзер чолöмалiс «Изьватас» котырöс 20 во тырöмöн
Вячеслав Гайзер чолöмалiс съезд вылö воысьясöс öтйöза öтмунöмлы 20 во тырöмöн да тöдчöдiс, мый «Изьватас» кывкутö изьватаслысь национально-культурнöй, социальнöй да экономическöй интересъяс видзöм вöсна.
«Изьватас вермисны миян кадöдз видзны ассьыс материальнöй да духовнöй культуралысь вöвлытöмторъяс, кöнi öтлаасьöны уджалан да бытöвöй традицияяс, йöзкостса прöмысел да искусство, пöль-пöчлöн духовнöй кольöмтор, да топыда йитчö миян республикаса уна сикас войтыркöд», - пасйис Республикаса Юралысь.
«Изьватас» öтувтö изьвасаöс оз сöмын республикаын, но и Мурманск кытшын, Ненеч, Ханты-Манси асшöрлуна кытшын, Москваын да Санкт-Петербургын.
2004 воын «Изьватас» пырис Россия Федерацияса Войвыв, Сибир да Ылыс Асыввыв этша лыда вужвойтырлöн ассоциацияö.
Юралысь тöдчöдiс «Изьватаслысь» ыджыда пай экология мытшöдъяс бырöдöмын, «Сэбысьлы» заказник статус кольöмын, изьватаслысь правояс дорйöмын, экология проектъяс збыльмöдöмын.
Регионса Юралысь висьталiс, мый локтан кадö примитасны «Кöр видзöм йылысь» оланпас. «Тöда, мый сiйö сетас бурджык условиеяс кöр видзысь овмöсъяслы да кутас видзны республикалöн войвывса войтырлысь традиционнöй оланног. Кöр видзысьяс вермасны босьтны государствосянь отсöг, гарантияяс да компенсацияяс, лоö урчитöма да ладмöдöма вöр-ваöн вöдитчöм кузя юалöмъяс», - пасйис Коми Республикаса Юралысь.
Республикаса Юралысь сетiс «Изьватас» регионкостса öтйöза öтмунöмöн юрнуöдысь Валентина Ануфриевалы «Коми Республика водзын заслугаясысь» отличие пас. Сiдзжö Вячеслав Гайзер сетiс Коми Республикаса почёт грамотаяс Эмилия Братенковалы да Надежда Хозяиновалы, Изьва шöр школаса да Мокчой школаса велöдысьяслы.
