Коми блогйысьясӧс корӧны пырӧдчыны конкурсӧ
Заводитчис «Коми блогйысь – 2017» коми блогйысьяс костын II республиканскӧй конкурс.
Конкурсӧ паніс «Коми войтыр» дінмукостса ӧтйӧза ӧтмунӧмлӧн Сыктывкарса петкӧдланін, сьӧмнас отсалӧ Коми Республикаса национальнӧй политика министерство да Коми Республикаса войтырлӧн ёртасян керка.
Пырӧдчыны вермасны блогйысьяс либӧ организацияяс, кодъяслӧн эмӧсь коми кывъя ас блогъяс либӧ дневникъяс. Кыдзи колян во лоасны татшӧм номинацияяс: «Медбур юӧр», «Медся зіль блогйысь», «Менам олӧмын коми кыв». Выльторйӧн лоас «Выль ним» номинация. Конкурсын вермасны участвуйтны 2016 во вӧльгым тӧлысся 1 лунсянь 2018 во тӧвшӧр тӧлысся 31 лунӧдз йӧзӧдӧм уджъяс.
Статьяяс да блогъяс донъялігӧн кутасны тӧд вылын кутны сюрӧслун (юӧрлӧн тырвыйӧлун да збыльлун, серпасалӧмъяс, аслыспӧлӧс гижӧдъяс да визуальнӧй материалъяс); коми гижӧдлӧн серпаслун; тӧдӧмлун (ӧнія коми кывлӧн орфография, пунктуация, грамматика да стилистика правилӧяслы лӧсялӧм); дизайн (блоглӧн ортсы, оформитӧмлӧн аслыспӧлӧслун, шрифтъяс да рӧмъяс бӧрйӧм); интер-активносьт (видео-, аудиозаписьяс, сайтъяс вылӧ гиперссылкаяс). «Медся зіль блогйысь» номинацияын тӧд вылӧ босьтӧны оз сӧмын постъяслысь да комментарийяслысь лыд, но и налысь сюрӧслун да тӧдӧмлун.
Конкурслысь кывкӧртӧдъяс вӧчасны урасьӧм тӧлысьын Чужан кывлы сиӧм лунӧ.
Конкурсӧ позяс пырӧдчыны 2018 вося урасьӧм тӧлысь 1 лунӧдз, гижны заявка «Коми блогйысь» конкурс» пасӧн да ыстыны «Коми войтыр» МОД-лӧн инпас серти: 167010, Сыктывкар, Ленин ул, 74 керка, 17 жыр либӧ электроннӧй инпас вылӧ: komi.vojtyr@mail.ru.
Коді кӧсйӧ восьтыны ассьыс блог, но оз куж да тӧд кыдзи сійӧс вӧчны, то сылы позяс волыны велӧдан семинар вылӧ. Сійӧ мунас ӧшым тӧлысь 8 лунӧ 16:00 часын С.Маршак нима челядьлы библиотекаын (Сыктывкар, Советскӧй ул., 20). Семинарсӧ нуӧдасны Ӧньӧ Лав да Алёна Тувсовъя (Алёна Нестерова) блогйысьяс. Найӧ юксясны ас уджӧн да восьтасны ӧтуввез-дневник нуӧдӧмлысь гусяторъяс.
«Коми блогйысь» конкурссӧ ми нуӧдам, медым ышӧдны йӧзӧс вӧдитчыны Ӧтуввезйын коми кывйӧн да петкӧдлыны коми кывлысь тӧдчанлунсӧ», - пасйис Коми Республикаса национальнӧй политикаса министр Галина Габушева.
Конкурсын вермысьяслы сетасны дона козинъяс, а став пырӧдчысьлы ошкана козинъяс.
Конкурс йылысь положениеӧн позяс тӧдмасьны Коми Миннацлӧн сайт вылын разделе Конкурсы.
*** Медводдзаысь «Коми блогйысь» муніс 2016 воын. 2017 воын году нуӧдісны куим акция: Коми письменносьт лун кежлӧ «Коми гижӧд лун», Айму вӧсна Ыджыд тышлы сиӧм лун кежлӧ «Айму вӧсна Ыджыд тыш» да шойччӧм йылысь «Шойччам коми ногӧн».
Фотографияяс
 |
