«Луздор» муниципальнӧй районса юралысь бердын серпасасян да киӧн вӧчасян шӧрин пасйис ассьыс 20 вося тшупӧдсӧ выставкаӧн
Коми Республикаса национальнӧй политика министр Галина Габушева чолӧмаліс татчӧс уджалысьясӧс тшупӧда пасӧн.
Аслас чолӧмалӧмын министр пасйис, мый "Шӧрин – аслыспӧлӧс ин, кӧні лӧсьыда ӧтлаасьӧмны важся да ӧнія культура".
"Тані лӧсьыд кагалы да верстьӧ мортлы. Быдӧн вермас аддзыны сьӧлӧм сертиыс удж, ӧд учреждениелӧн зэв уна туйвизь. Этнографическӧй материал чукӧртӧмӧн, Ті ловзьӧданныд да сӧвмӧданныд коми войтырлысь йӧзкостса культура. Ӧтпырйӧ пыртанныд ӧнія проектъяс. Уджалысьяслӧн нырччӧм, тӧдӧмлунъяс да ыджыд опыт отсӧгӧн Шӧринӧс пыдди пуктӧны район сайын", - тӧдчӧдіс Г. Габушева.
Министр пасйис учреждениелысь медся тӧдчана проектъяс: Юӧртан-туристическӧй Визит-Шӧрин, "Луздорса козин" киоск, "Том мастерлӧн школа" челядьлӧн образцовӧй котыр, "Эзысь тылöс" восьса юӧртан площадка, "Пӧль-пӧчлӧн ордым" этнотуристическӧй туй, "Тарачево" этнотуристическӧй парк.
Абъячойын Галина Габушева чолӧмаліс «Мастер – зарни ки» ХХ районса конкурсӧ пырӧдчысьясӧс. Министр торйӧн аттьӧаліс учреждениеӧс восьтысьясӧс: Валентина Христиановна Табачукӧс да Василий Александрович Гуторовӧс. 20 во сайын В. Табачуклысь водзмӧстчӧмсӧ ошкис В. Гуторов, районӧн веськӧдлысь. Валентина Христиановна вӧлі Шӧринлӧн медводдза директорӧн, а талунъя веськӧдлысьыс Олег Никулин, тшӧтш сылӧн велӧдчысь.
Выставка вылӧ ыстӧмаӧсь 350 удж: пуысь да сюмӧдысь, дӧра вылӧ серӧдлӧм, кос да ваӧн валяйтӧм, серӧн кыӧм, серпасъяс, пуӧ серпасалӧм да мукӧд. Конкурсын петкӧдчисны Луздорысь 70 мастер.
