Коми вöралысьяслысь да чери кыйысьяслысь гусяторъяс восьтiсны конкурс вылын
Иван Куратов нима Сыктывкарса гуманитарно-педагогическöй колледжын муніс том коми зонъяс костын «Пера - богатырь-2016» республикаса конкурс .
Вермасьӧмсӧ сиисны коми вöралысьяслöн да чери кыйсьысьяслöн традицияяслы. Вӧвлӧмторсӧ котыртісны «Этноуниверситет» уджтаскӧд йитӧдын Коми Республикаса войтырсикас министерство да Войтыръяслӧн ёртасян керка отсöгöн.
Конкурсын петкöдчисны вит коми зон–вöралысь. Тайö Куратов нима Сыктывкарса гуманитарно-педагогическöй колледжысь Иван Фучик да Пелагий Рочев, вöрса институтысь студент да сыктывкарса «Изьватас» землячествоысь зон Михаил Канев, Коми культура шöринысь специалист, том коми войтырлӧн «МИ» котырын водзмӧстчысь Андрей Габов да Сыктывкарса канму университетысь фин-йöгра филология кафедра вылын велöдчысь Вадим Семяшкин.
«Пера-богатырь» конкурс артмис некымын тшупöдысь. Медводдзаас вӧлі – «Самопредставление» - том йöз висьталісны ас йывсьыныс, петкöдлісны енбиныссö. Зонъяс тӧдмӧдісны асланыс семьяын вöралан традиияяскӧд. Мöд тшупöдын вöлі викторина: участникъяс вочавидзины коми вöралысьяслöн обычайяс да традицияяс йылысь жюрилöн юалöмъяс вылö. А коймöд тшупöд вылас зонъяс петкöдлісны-ворсісны обрядъяс, кöні тыдовтчис ас районлӧн кыйсьысь-вöралысьяслӧн торъялаöмыс.
Уна вöралан традиция вунöма, но тайö луннас зонъяс водзын сулаліс мог – небöгъясысь лыддьöм, ас войтырлысь тöдмалöм бöрын ловзьöдны да мичаа петкöдлыны тайö традицияяссö велöдчысьяслы, студентъяслы, велöдысъяслы да гöстьяслы, а, сідзкö, кольны водзö олысьяслы, öд видзöдысъяс пиын вöліны велöдысъяс, кодъяс вермасны кужöмöн пыртны уджаныс тайö конкурсысь босьтöм тöдöмлунъяссö.
Жюрилöн видзöдлас серти, став зонмыслы позьö вӧлі сетны «Пера – богатырь» ним. Но медся тöдчана шöр муртöснас вермысьысьöс бöрйöмын лоис чужан кыв да традицияяс дорö муслун, кодöс и кöсйисны петкöдлыны участникъяс. «Медся гажа» ним вичмис Михаил Каневлы, «Медся сюсьöн» лоис Пелагий Рочев, «Медся енбиа» - Иван Фучик, а миян канму университетса велöдчысь, Вадим Семяшкин, босьтіс «Медся сьылысь» ним. «Пера – богатырь - 2016» ним жюри сетіс Андрей Габовлы.
Анна МАХОТИНА
Фотоясыс конкурссö котыртысьяслöн
Фотографияяс
 |
 |
 |
 |
 |
