Искусство гимназияса этнокультура шöринын кольöм вежонö тöдмöдісны «Коми Республикаса литература календарöн». Дасьтісны сійöс Санкт-Петербургса «Неватас» коми землячествоын водзмöстчысьяс, а йöзöдісны национальнöй политика министерстволöн да Рытыв-Войвыв кытшын Коми представительстволöн отсöгöн.
Календар вöчöмö ыджыд пай пуктісны историк, этнограф, Россияса наука академиялöн антропология да этнография музейысь юкöнöн веськöдлысь Александр Терюков, А.Герцен нима университетын велöдчысь Марина Дежурова, П.Сорокин нима Сыктывкарса университетын велöдысь Алексей Рассыхаев, Санкт-Петербургын Коми представительствоын уджалысь Марина Абачинская, художникъяс Юрий Лисовский да Павел Микушев. Налöн видзöдлас серти, коми литературалöн подулöн лоöны мифология да фольклор. И тайö видзöдласыс ясыда тыдовтчö выль петасын, кöні литературасö йитöма коми вöралысьлöн календаркöд.
–Ми зілим петкöдлыны коми литературалысь тöдчанлунсö. Дерт, тö-рöдны сэтчö став гижысь йылысь пасйöдсö он вермы, но календарыс öд абу энциклопедия. Сійö ышöдö медводз том йöзöс пыдісяньджык тöдмасьны коми литературанас, – пасйис петаснас тöдмöдігöн представительствоöн веськöдлысь Валерий Кюршин.
Представительство быд во йöзö-дö календаръяссö. Висьтавсьö сэні коми художникъяс, киподтуя йöз, томъяслöн уджтасъяс, регионын туризм сöвмöдан позянлунъяс йылысь. Таво петіс «Коми в Петербурге» календар. Сійö тöдмöдö Каллистрат Жаковлöн, Питирим Сорокинлöн, Семён Налимовлöн, Энгельс Козловлöн да Комиын чужлöм мукöд нималана йöзлöн Петербургкöд йи-тöдъясöн.
Искусство гимназия помалысьяс быд во пырöны водзö велöдчыны Санкт-Петербургса вуз-колледжö, и Валерий Кюршин кöсйысис котыртлыны налы «По адресам знаменитых коми» экскурсия, а тавося календарыс петкöдлас нин, кыті вермас мунны тайö экскурсияыс, öд сэні пасйöма и Питерса уличаяс, и керкаяс, кöні овлöмаöсь-уджавлöмаöсь нималана коми йöз.
–Миян шöр могъясысь öти – видзны-сöвмöдны вужвойтырлысь кыв, культура, традицияяс, – висьталіс национальнöй политикаса министрöс вежысь Юрий Хатанзейский. – Нимкодь, мый «Неватас» землячествоса зільöны вöчны тайöс и Петербургын.
