Коми Республикаса войтырлöн ёртасян керкаын Победалы 70 во тырöмлы сиöм кыпыд чукöртчылöм дырйи нимöдiсны регионысь национально-культурнöй автономияясын да землячествоясын водзмöстчысьясöс — Айму вöсна Ыджыд тышса ветеранъясöс, тылын зiльысьясöс да войнаса челядьöс, кодъяслы мойвиис пыкны би пыр мунöм воясся став сьöкыдлунсö, дойсö да шогсö. Чукöртчöмаясöс Пöбеда лунöн чолöмалiс Коми Республикаын национальнöй политика министр Галина Габушева.
Нывбабаяс казьтылiсны война да войнабöрвывса кадсö, фронтвывса ёртъяссö, война кадся челядьдыр.
Аддзысьлöм дырйиыс рытывбыд юргисны сьыланкывъяс, кывбуръяс, частушкаяс. Арлыд вылö видзöдтöг збоя йöктiсны "Рио-Рита", кокниа бергалiсны вальс, петкöдлiсны "Цыганочка с выходом" да роч кадриль.
Праздник вылас чукöртчöмаясöс гажöдiсны Коми Республикаса народнöй артистъяс Пётр Шучалин да Василий Рочев.
Янсöдчигöн гöстьяслы козьналiсны дзоридзьяс да кампет кöрöбка.
