Коми гижöд лунöн
Пыдди пуктана Коми Республикаын олысьяс!
Коми Республикаса национальнöй политика министерство чолöмалö тiянöс Коми гижöд лунöн.
1992 восянь быд во ода-кора тöлысьлöн коймöд вежалунö Коми муын паськыда пасйöны Коми гижöд лун. Тайö зэв тöдчана да ыджыд праздник, кутшöмöс пасйöны Республикалöн быд пельöсын да нимöдöны коми гижöд. Квайтсё воысь унджык колис сiйö кадсянь, кор вежа Степан лöсьöдiс медводдза коми анбур.
Зэв тöдчана, мый 2014 во чöж Коми му пасьтала пасйöны медводдза коми кывбуралысьлысь, коми литература подув пуктысьлысь, Иван Алексеевич Куратовлысь тшупöда пас, чужан лунсянь 175 во тырöм. Тайö ыджыд лоöмторлы сиисны уна мероприятие, кутшöмъяс нуöдасны тайö лунъясö школаясын да библиотекаясын, музейясын да шöринъясын, каръясын да грездъясын. Коми гижöд лун пасйöны Москваын да Санкт-Петербургын, Комиын да весиг ылi Алматы карын. Тайö тувсовъя лунъясö Комиысь гижысьяс казьтывлöны Казахстан му вылын Иван Алексеевич Куратовöс.
И.Куратов зэв стöча гижис чужан кыв йылысь «небыд, мича, гора». И збыль, коми кыв миян мича да миянлы зэв дона. И зэв ёна кöсйыссьö, медым сiйö паськыдджыка юргис.
Став сьöлöмсянь чолöмала Коми гижöд лунöн да кöсъя помавны сиöмöс коми кывбуралысь В.Тиминлöн кывъясöн:
Кывным миян
Шондi дзирд кодь мича.
Кутчысямöй ас кывйö,
Öд сiйö
Асьнымöс на медся ёна видзö.
Мед олас да сöвмас коми гижöд!
