Победа дорысьöс нимöдiсны
Коми Республикаса войтырлöн ёртасян керкаын Победалы 69 во тырöмлы сиöм кыпыд чукöртчылöм дырйи нимöдiсны регионысь национально-культурнöй автономияясын да землячествоясын водзмöстчысьясöс — Айму вöсна Ыджыд тышса ветеранъясöс, тылын зiльысьясöс да войнаса челядьöс, кодъяслы мойвиис пыкны би пыр мунöм воясся став сьöкыдлунсö, дойсö да шогсö.
Аддзысьлöм дырйиыс рытывбыд юргисны сьыланкывъяс, кывбуръяс, частушкаяс. Юркарысь бать-мамтöг да налöн дöзьöртöг кольöм челядьлöн 3 номера керкаысь «Юность» сьылан котырысь нывъяс петкöдлiсны литературно-музыкальнöй композиция. Педколледжысь творческöй котыр сьылiс война кадся сьыланкывъяс, а «Дансфорысь» йöктысьяс вöрзьöдiсны видзöдысьяслысь сьöлöм-ловсö асланыс тангоöн.
Ёна нимкодь вöлi ветеранъяслы, кор найöс чолöмалiсны медся том артистъясыс — 53 номера детсадйысь нывкаяс да зонкаяс. Найö и мичаа йöктiсны, и сьöлöмсяньыс сьылiсны. Лов шынысö кутöмöн, доршасьысь синванысö чышкалöмöн кывзiсны налысь «Победа придёт» да «Расскажите нам о войне» сьыланкывъяссö.
Праздник вылас чукöртчöмаясöс гажöдiсны сiдзжö Коми Республикаса народнöй артистъяс Пётр Шучалин да Василий Рочев.
Концерт бöрас олöма йöз казьтыштiсны ылö бöрö кольöм кадсö, кодi кöнi тышкасьöма фашистъяслы паныд, вир кисьтана косьясын воштöма фронтвывса ёртъяссö. Дерт жö, частушкаяс сьылiсны да тшöтш и военнöй танго йöктiсны.
Рытсö сигöртiгöн нин ставöн чöсмасисны полевöй кухняын пуöм чöскыд греча рокöн.
Казьтыштам, Великöй Отечественнöй войнаса ветеранъяскöд да тылын зiльысьяскöд Победа лунлы сиöм татшöм кыпыд аддзысьлöмъяссö Коми Республикаса войтырлöн ёртасян керкаын уджалысьяс нуöдöны регионса национальнöй политика министерствоын зiльысьяскöд öтвылысь 2000 восянь нин.
Фотографияяс
 |
 |
 |
 |
 |
 |
 |
